ತೆಂಕುತಿಟ್ಟು ಯಕ್ಷಗಾನದ ಕಲಾವಿದರಾದ ಶ್ರೀ ಉಬರಡ್ಕ ಉಮೇಶ್ ಶೆಟ್ಟಿಯವರಿಗೆ ಸಂಮಾನ

 ತೆಂಕುತಿಟ್ಟು ಯಕ್ಷಗಾನದ ಕಲಾವಿದರಾದ ಶ್ರೀ ಉಬರಡ್ಕ ಉಮೇಶ್ ಶೆಟ್ಟಿಯವರಿಗೆ ಸಂಮಾನ 

           ‌  ತೆಂಕುತಿಟ್ಟಿನ ಹಿರಿಯ ಕಲಾವಿದರಾದ ಶ್ರೀ ಉಬರಡ್ಕ ಉಮೇಶ್ ಶೆಟ್ಟರನ್ನು 10.12.2024 ರಂದು ಮೂಡುಬಿದಿರೆ ಶ್ರೀ ಮಹಾಗಣಪತಿ ಮಹಾಲಿಂಗೇಶ್ವರ ದೇವಸ್ಥಾನದಲ್ಲಿ ಜರುಗಿದ  ಹನುಮಗಿರಿ ಮೇಳದವರ ಯಕ್ಷಗಾನ ವೇದಿಕೆಯಲ್ಲಿ , ಯಕ್ಷಗಾನ ಅಭಿಮಾನಿಗಳು ಮೂಡುಬಿದಿರೆ ವತಿಯಿಂದ ಸಂಮಾನಿಸಲಾಯಿತು . 

ಉಮೇಶ್ ಶೆಟ್ಟರನ್ನು ಅಭಿನಂದಿಸುತ್ತಾ , ಮೂಡುಬಿದಿರೆ ಯಕ್ಷಸಂಗಮದ ಸಂಚಾಲಕ ಶ್ರೀ ಎಂ.ಶಾಂತರಾಮ ಕುಡ್ವರು , " ಅಳಿಕೆ ರಾಮಯ್ಯ ರೈಯವರ ಸೋದರಳಿಯರಾದ ಶೆಟ್ಟರು , ಅಳಿಕೆಯವರ ಪ್ರೇರಣೆ , ಪ್ರೋತ್ಸಾಹದಿಂದಾಗಿ 1972ರಲ್ಲಿ ಧರ್ಮಸ್ಥಳ ಲಲಿತ ಕಲಾಕೇಂದ್ರದ  ಪ್ರಾಥಮಿಕ ಸಾಲಿನ ವಿದ್ಯಾರ್ಥಿಯಾಗಿ ಸೇರಿ , ಧರ್ಮಸ್ಥಳ ಮೇಳಕ್ಕೆ ಸೇರ್ಪಡೆಗೊಂಡು ಯಕ್ಷರಂಗ ಪ್ರವೇಶಿಸಿದರು . ಯಕ್ಷಗಾನದ ಪುಂಡು ವೇಷ , ಸ್ತ್ರೀ ವೇಷ , ರಾಜವೇಷ , ಬಣ್ಣದ ವೇಷ , ಮಹಿಷಾಸುರನಂತಹ ಪಾತ್ರಗಳನ್ನೂ ನಿರ್ವಹಿಸುವ ಪ್ರತಿಭೆ ಉಮೇಶ ಶೆಟ್ಟರದ್ದು . ಸುಪ್ರಸಿದ್ಧ ಕಲಾವಿದರಾದ  ಪುತ್ತೂರು ನಾರಾಯಣ ಹೆಗ್ಡೆ , ಎಂಪೆಕಟ್ಟೆಯವರ ನಂತರದಲ್ಲಿ ಅವರ ಪಾತ್ರಗಳಿಗೆ ಉಮೇಶ್ ಶೆಟ್ಟರು  ಉತ್ತರಾಧಿಕಾರಿಯಾಗಿ ಬೆಳೆಯುವಲ್ಲಿ ಅವರ ಪ್ರತಿಭೆಯನ್ನು ಗುರುತಿಸಬಹುದು . ಧರ್ಮಸ್ಥಳ ಮೇಳದಲ್ಲಿ ನಿರಂತರ 43 ವರ್ಷಗಳ ತಿರುಗಾಟ ನಡೆಸಿದ್ದ ಶೆಟ್ಟರು 2015 ರಲ್ಲಿ ನಿವೃತ್ತಿ ಹೊಂದಿದರೂ , ಹನುಮಗಿರಿ ಮೇಳದಲ್ಲಿ ಅತಿಥಿ ಕಲಾವಿದರಾಗಿ ಕಲಾ ರಸಿಕರನ್ನು ರಂಜಿಸುತ್ತಿರುವುದು ಸಂತಸದ ವಿಚಾರ ‌. ಅವರು ಇನ್ನಷ್ಟು ಸಂಮಾನ - ಪುರಸ್ಕಾರ  ಸ್ವೀಕರಿಸುವಂತೆ ದೇವರು ಕರುಣಿಸಲಿ " ಎಂದು ಹಾರೈಸಿದರು .

            ಮೂಡುಬಿದಿರೆ ಯಕ್ಷಗಾನ ಪೋಷಕರು , ಯಕ್ಷಧ್ರುವ ಪಟ್ಲ ಫೌಂಡೇಶನ್ ( ರಿ ) ಮೂಡುಬಿದಿರೆ ಘಟಕದ ಸಂಚಾಲಕರಾದ ಉದ್ಯಮಿ ಶ್ರೀ ಕೆ.ಪ್ರೇಮನಾಥ ಮಾರ್ಲರ ನೇತೃತ್ವದಲ್ಲಿ ಸಂಮಾನ ಜರುಗಿತು. ಸಂಮಾನ ಕಾರ್ಯಕ್ರಮದಲ್ಲಿ ದೇವಸ್ಥಾನದ ಆಡಳಿತ ಮೊಕ್ತೇಸರರು  ವೇದಮೂರ್ತಿ ಶ್ರೀ ಕೆ.ಈಶ್ವರ ಭಟ್ ಅಲಂಗಾರ್ , ಉದ್ಯಮಿ ಪುನೀತ್ ಕಟ್ಟೆಮಾರ್ , ಶ್ರೀ ವಿಜಯಲಕ್ಷ್ಮೀ   ಕ್ಯಾಶ್ಯೂ ಇಂಡಸ್ಟ್ರೀಸ್ ನ ಮಾಲಕ ಶ್ರೀ ಎ.ಕೆ.ರಾವ್ , ಯಕ್ಷಗಾನ ಪೋಷಕರಾದ ಶ್ರೀ ರವಿಪ್ರಸಾದ್ ಶೆಟ್ಟಿ , ಶ್ರೀ ಉಮೇಶ್ ಶೆಟ್ಟರು ವೇದಿಕೆಯಲ್ಲಿ ಉಪಸ್ಥಿತರಿದ್ದು ಉಮೇಶ್ ಶೆಟ್ಟರನ್ನು ಸಂಮಾನಿಸಿದರು  . ರವಿಪ್ರಸಾದ್ ಶೆಟ್ಟರು ಧನ್ಯವಾದ ಅರ್ಪಿಸಿದರು .